78,842 కార్డులు తొలగించేందుకు సన్నాహాలు
నేటి దర్శిని (న్యూస్ డెస్క్): తెలంగాణ రాష్ట్ర ప్రభుత్వం తీసుకున్న తాజా నిర్ణయం రాష్ట్రవ్యాప్తంగా చర్చనీయాంశంగా మారింది. ఇప్పటికే పౌరసరఫరాల శాఖ ద్వారా రాష్ట్రంలో అర్హులకు రేషన్ కార్డులు అందజేసిన సంగతి తెలిసిందే. ఈ రేషన్ కార్డుల ఆధారంగా పౌరులు పలు పథకాల లబ్ధిని పొందుతూ వస్తున్నారు. అయితే గడిచిన కొంత కాలంగా వేలాదిమంది కార్డుదారులు తమ రేషన్ కార్డులను వినియోగించకుండానే ఉండిపోతున్నారు. ఈ నేపథ్యంలో, వరుసగా ఆరు నెలలపాటు రేషన్ తీసుకోని కార్డులను రద్దు చేయాలని పౌరసరఫరాల శాఖ నిర్ణయం తీసుకుంది. అధికారులు రాష్ట్రవ్యాప్తంగా నిర్వహించిన సమగ్ర పరిశీలనలో 78,842 రేషన్ కార్డులు గత ఆరు నెలల్లో ఒక్కసారి కూడా ఉపయోగించని విషయాన్ని గుర్తించారు. దీంతో, ఈ రకం కార్డులన్నీ త్వరలోనే రద్దు చేయాలని ప్రభుత్వం ఆదేశాలు జారీ చేసింది. ఈ మేరకు జిల్లా కలెక్టర్లు అందించిన నివేదికల ఆధారంగా ప్రతి కార్డుదారుని స్థాయి స్థాయిలో పరిశీలించి, వారి అర్హతను నిర్ధారించారు. ఈ పరిశీలనలో నల్గొండ, మేడ్చల్, రంగారెడ్డి, హైదరాబాద్ జిల్లాల్లో ఈ తరహా వినియోగం లేని కార్డులు అధికంగా ఉన్నట్లు వెల్లడైంది. పౌరసరఫరాల శాఖ అధికారుల ప్రకారం, అర్హత లేని వారు ఇప్పటికీ కార్డులను కలిగి ఉండటంతో ప్రభుత్వ నిధులు వృథా అవుతున్నాయనీ, అందుకే ఈ చర్య అవసరమయ్యిందని పేర్కొన్నారు. త్వరలోనే ఈ రద్దు ప్రక్రియ అధికారికంగా ప్రారంభం కానుంది.
